Maskarada Zuberoan inauterietan egiten daben antzezpena da. Hango tradizinoan, urte bakotxean herri batek hartzen dau antzezteko ardurea, eta urtarriletik apirilera bitartean herririk herri joaten dira euren dantzak, kantuak eta okerkeriak erakusten.
Zuberoako maskaradak pertsonaia finko batzuk ditu, baita be dantza eta kantu batzuk be, edo hobeto esanda, dantzatzeko eta kantatzeko modu batzuk, pertsonaien arabera.
Gure artean ohikoa izan da Bizkaitik Zuberoara joatea maskarada ikusten, baita dantzak ikasten be. Eta ez dira gitxi gure artean maskaradako dantzak egiten dabezan taldeak, euren ikuskizunaren barruan.
Aurten, ostera, maskarada bera osorik egingo dabe talde bik gitxienez gure artean. Otsailaren 9an, Basurtuko Jai Alai taldeak maskarada osorik antzeztu eban Kastrexanan, hango Santa Agedako jaien testuinguruan.
Hil honetan bertan, 22an, Galdakaon beste horrenbeste egingo dau herriko Andra Mari taldeak, bere 70. urteurrena ospatzeko programaren barruan.
Goizeko 10etan hasiko dira barrikadak eleiza ondoan. Goiza holan joango da lau barrikada eginaz. Eta herri-bazkariaren ostean, arrastiko 16:30ean ofizioak erakutsiko dabez. Ez da plan txarra, animatu!
