Gaurkoan literatur lehiaketa biren barri emongo dogu.
Alde batetik, Lezamako Udalak eta Elkar argitaletxeak, haur literaturako Mikel Zarate lehiaketa antolatu dabe. Helburua umeentzako irakurgai barriak sortu eta idazleen lana bultzatzea da.
Sari horretan, Lehen Hezkuntzako ikasleentzat (6-12 urte bitartekoentzat) euskeraz sortutako kontakizunak aurkeztu daitekez, jatorrizkoak, beste inondik moldatu bakoak eta aurretik saririk jaso edo argitaratu ez direnak.
Lanok, gitxienez 25.000 eta gehienez 100.000 karaktere euki beharko dabez, hutsune eta guzti.
Lanak apirilaren 30era arte bialdu behar dira eta sari bakarra egongo da, 4.000 eurokoa.
Eta bestetik, Leioako Udalak XXVI. Narrazino Lehiaketa atondu dau, Ni gaztea nintzenean… goiburua hartuta. Asmoa da idazkera eta narrazinoa garatzeko aukerak ahalbidetzea, memorian gordetako akordu guztiak eta gaztaroko garaiak gogora ekarrita.
Lanak aurkezteko epea apirilaren 4ra arte egongo da edegita. Parte-hartzaile bakotxak gehienez narrazino bi aurkeztu ahal izango ditu, euskeraz edo gaztelaniaz eta gehienez be lau orri izango ditu, alde bakarretik idatzia.
Lau kategoria egongo dira, parte-hartzaileen edadearen arabera: 18 urtera arte; 19 urtetik 39ra; 40tik 59 urtera; eta 60tik aurrera. Kategoria bakotxean sari bi banatuko dira: lehenengoa, 250 euro, garaikurra eta diplomea; eta bigarren saria, 125 euro, garaikurra eta diplomea.
